| بدی سے دامن کو ہے بچانا، بچا کے رکھنا کمال یہ ہے |
| حیا سے اپنی نظر جُھکانا، جُھکا کے رکھنا کمال یہ ہے |
| جہاں پہ فیشن رچا بسا ہو، دلوں میں شیطان بھی گُھسا ہو |
| لباسِ سنت وہاں سجانا، سجا کے رکھنا کمال یہ ہے |
| عمل میں اخلاص گر ہو شامل، ملاؤ تقوی بنے یہ کامل |
| ریا کی خواہش کو پھر دبانا، دبا کے رکھنا کمال یہ ہے |
| ہے سوچ منفی عذاب ہم پر، کرے گا مولا عِتاب ہم پر |
| دلوں میں مثبت گُماں جمانا، جما کے رکھنا کمال یہ ہے |
| مٹھاس غیبت میں کس قدر ہے، یہ لت بھی کتنی عروج پر ہے |
| زبان سے ہے یہ لت مِٹانا، مِٹا کے رکھنا کمال یہ ہے |
| کسی کو نعمت ہزار دے دے، کسی کو مشکل سے چار کردے |
| رِضا پہ رب کی ہے سر جُھکانا، جُھکا کے رکھنا کمال یہ ہے |
| قصور زیرکؔ کے در گُزر کر، تو خلد میں اس کو گھر عطا کر |
| خدا کی رحمت سے لَو لگانا، لگا کہ رکھنا کمال یہ ہے |
معلومات