| سازِ ہستی کی سَحر دم پھر صدا آنے لگی |
| رات بھر کی خامشی سے اک نِدا آنے لگی |
| چیرتی تیرہ فضا کو آسماں پر لَو گئی |
| صحنِ گُلشن میں سحر کی پھر ضیا آنے لگی |
| لو بلادِ زندگی میں آ گیا پھر آفتاب |
| روشنی بزمِ جہاں کے رنگ دکھلانے لگی |
| شب کی ظُلمت چَھٹ گئی ہر سُو اُجالا ہو گیا |
| پھر سروں پر آشنائی کی رِدا آنے لگی |
| عارضِ گُل کو ملی پھر آسمانوں سے جِلا |
| شبنمیں سبزے پہ سونے کی قبا آنے لگی |
| مستئی شب کا فُسوں ٹُوٹا سحر کے نُور سے |
| کاروانِ شوق سے بانگِ درا آنے لگی |
| پھر لِباسِ زندگی پہنا عروسِ ارض نے |
| آسمانوں سے صدائے مرحبا آنے لگی |
| نکہتِ گُل، گُل کے سینے میں ہُوئی بیدار پھر |
| نکہتِ گُل سے لپٹ کر پھر صبا آنے لگی |
| خواب آگیں فُرصتِ شب سے ہُوئے بیدار جب |
| سب چمن والوں کو جینے کی ادا آنے لگی |
| صحنِ گُلشن میں گُلوں کو مُسکراتا دیکھ کر |
| یاد مُجھ کو ایک بُھولی سی دُعا آنے لگی |
معلومات