| بن مانگے دے رہا ہے خدا بار بار دے |
| جب جس کی چاہتا ہے وہ قسمت سنوار دے |
| اس کے حضور جھک کے کریں التجائیں جو |
| کرنے کو سارے کام فرشتے اتار دے |
| واجب ہے اس کا شکر کرے بندہ ہر گھڑی |
| دیتا ہے ایک دکھ تو وہ نعمت ہزار دے |
| طوفان لے کے آئے غضب میں وہ جب بڑھے |
| کشتی میں پھر کسی کسی کو پار اتار دے |
| ایسے بھی تو وفا کا کبھی امتحان لے |
| صیقل کرے وہ دشت میں جس کو اتار دے |
| پتھر کو بھی بنائے وہ سونے کی اک ڈلی |
| کندن بنا کے ہاتھ سے اپنے نکھار دے |
| دے کر وہ حکم باپ کو بیٹا کرو فدا |
| بیٹے کو پھر ہٹا کے وہ مینڈھا اتار دے |
| جس دل میں اپنے پیار کی دیکھے وہ اک جھلک |
| لاکھوں گنا وہ آگے ہو کے اس کو پیار دے |
| جب ہر قدم پہ ساتھ وہ دیتا ہے پیار سے |
| بندے کا بھی تو حق ہے وہ بھی جان وار دے |
| پڑتی ہیں جب ہمارے سر پہ آزمائشیں |
| وہ دل ہی کیا جو خوف سے میدان ہار دے |
| طارق اسی کی دی ہوئی ہے جب یہ زندگی |
| جاں بھی فدا ہوئی تو کہاں قرض اتار دے |
معلومات