| الفت کے تقاضے جو نبھانے نہیں آئے |
| مجبورئِ حالات ، بتانے نہیں آئے |
| ساقی کو پلانے کا بہت شوق ہے لیکن |
| خُم آنکھوں ہی آنکھوں میں لنڈھانے نہیں آئے |
| شیریں نہ سخن ہو تو سنے کوئی بھلا کیوں |
| ویسے تو یہاں ، شعر سنانے نہیں آئے |
| جب دل میں نہ باقی ہو کوئی یاد وطن کی |
| لکھنے کبھی شاعر کو ترانے نہیں آئے |
| یادوں کے سمندر میں جو غوطے بھی لگاؤ |
| اک بار جو گزرے ہیں ، زمانے نہیں آئے |
| پیراک ہیں دریاؤں کی طغیانی سے کھیلیں |
| طوفان کی موجوں میں نہانے نہیں آئے |
| مہمان کی خاطر سبھی دروازے کھُلے ہیں |
| ہم غیروں سے ملنے کے بہانے نہیں آئے |
| قربانیاں دیتے رہے نکلے تھے سفر پر |
| رستے میں کہاں مذبحہ خانے نہیں آئے |
| طارقؔ یہی سن کر تو مری آنکھ کھلی ہے |
| آ ئے ہیں یہاں کون جو جانے نہیں آئے |
معلومات