ہم جھوٹے ہیں ہم جعلی ہیں |
انساں کو ننگی گالی ہیں |
جب چاہیں اپنی وحشت کو |
جب چاہیں اپنی شہوت کو |
معصوموں کے لہو سے صاف کریں |
مذہب کے نام پہ جب چاہیں |
ہم لوگوں کا قتلِ عام کریں |
مسلم کو ہم مرتد کہہ دیں |
یا مومن کو کفار کہیں |
جو بھی من میں اپنے آئے |
ہم اس کو سو سو بار کہیں |
پھر خود ہی اس پہ ہو کر منصف |
لوگوں کو لہو لہان کریں |
کبھی پتھروں سے کبھی ڈنڈوں سے |
ہم چاہیں جسے قربان کریں |
ہم متوالے فرقوں کے ہیں |
ہم کب مذہب کو مانیں ہیں |
نا شعور کی ہم میں بات کوئی |
نا ناطہ ہمارا دانش سے |
نعروں سے ہمارے گھن آئے |
بو آئے ہماری شہوت سے |
حیوان و پرند اور سب جیون |
ڈر جاوے ہماری دہشت سے |
ہم ہی اجاڑیں مادر کی جھولی |
ہم ہی کھیلیں خوں کی ہولی |
ہم ہیں منصور کے مجرم بھی |
ہم ہی سقراط کے قاتل ہیں |
جب بھی کہیں ناحق خون بہا |
ہم سب بھی اس میں شامل ہیں |
ہم خاکی دنیا کے پاپی ہیں |
ہم انساں کو ننگی گالی ہیں |
معلومات