.jpg)
| (1) |
| اک کوجی تے درد ہزاراں |
| پئ کرلاواں وانگ بیماراں |
| روگ عشق داجے ماہی بخشے |
| جِند چھُٹے کُل اَزاراں |
| (2) |
| ہوون دفتر, نوکر تے سرکاراں |
| دولت , عزت, بنگلے ,کاراں |
| جے خلق خدا تے ظلم کماویں |
| عہدے,ٹهاٹھ غضب دیاں ماراں |
| (3) |
| بھانویں سنداں جوڑ ہزاراں |
| جِت لے دنیا وانگ مكاراں |
| جے ملی نہ معرفت رب دی |
| سبھے علم, عقل بیکاراں |
| (4) |
| پا کے نفس نوں کا ٹھ، مہاراں |
| الا اللہ دیاں ضرباں ماراں |
| جے امارہ بن مطمئنہ جاوے |
| دوئیں جہانیں باغ بہاراں |
| (5) |
| چھڈ کے دنیا, شاہی تھاراں |
| بن بندہء عشق میں من ٹھاراں |
| جے مل جاۓ عشق قدیمی |
| تن من دھن اُس تھیں واراں |
| (6) |
| عارف رکھدے فرق نا یاراں |
| نہ وچ نیکاں نہ بدکاراں |
| ہر چہرے ہر نقش دی صورت |
| قدرت رب دی کرے اظہاراں |
| (7) |
| جد ہوسن پیش مجرم درباراں |
| کریم کریسی کرم ہزاراں |
| ویکھ دوئیں جہانیں اندر |
| رحمت نبی ﷺ نال بہاراں |
| (8) |
| ہوون لکھ سجن بیلی یاراں |
| بنسن دشمن نال حشر دیاں ماراں |
| پر نسبت قلندراں ولیاں دی |
| بنسی ٹھار اوگن ھاراں |
| (9) |
| پیر ,ملاں مثل لوہاراں |
| پر عاشق وانگ عطاراں |
| مشک عشق نال بھر دیندے |
| دل, جگر بدکاراں |
| (10) |
| مرشد دا کم مثل کمہاراں |
| تے سالک وانگ مزاراں |
| من وچ چانن ہو جاندا اے |
| جے راضی ہوون سرکاراں |
| (11) |
| حافظ ماہی دے ہتھ مہاراں |
| من وچ اس نوں وت پکاراں |
| ہک دا ہو کے سب دا ہو جا |
| غلام جویں رسی وچ تاراں |
معلومات