| دلگیر خامشی لئے ہے رات کس طرح |
| بھیجے اگر کوئی تو پیامات کس طرح |
| معلوم ہے مجھے وہ تکبر میں علم کے |
| بھرتے ہیں جاہلوں میں خرافات کس طرح |
| اسلام کے وقار سے کب ان کو پیار ہے |
| نیلام خود کو کرتے ہیں دن رات کس طرح |
| میرا وہ جاگنا وہ تری نیند رات بھر |
| مت پوچھ دن کٹے ہیں ترے ساتھ کس طرح |
| آنکھوں میں تشنگی تو حیا پلکوں میں کبھی |
| کٹتے گئے وہ زیست کے لمحات کس طرح |
| قسمیں تری فضول، اشارے رقیب کے |
| لیتا رہا ہمیشہ تو سوغات کس طرح |
| ہے آرزو کہ کام کسی کے تو آ سکوں |
| ظاہر کروں کسے یہ خیالات کس طرح |
| پابندیاں زباں پہ تو قدموں پہ بھی نظر |
| کوئی سنائے جا کے یہ حالات کس طرح |
| دل چاہتا ہے ہاتھ بڑھاؤں کہیں تو میں |
| لیکن بڑھاؤں کس کی طرف ہاتھ کس طرح |
| اب پوچھتا ہے کون ،ضیا، اشک بار سے |
| آنکھوں سے ہو رہی ہے یہ برسات کس طرح |
معلومات