| حرفِ حق ہے آگہی اور روشنی ہے حرفِ حق |
| جاں بلب انسانیت کی زندگی ہے حرفِ حق |
| حرفِ باطل دشمنی ظلم و ستم غارت گری |
| دوستی امن و اماں اور آشتی ہے حرفِ حق |
| بربریت ظلم سفاکی نشاں باطل کے ہیں |
| صبر و استقلال اور تشنہ لبی ہے حرف حق |
| وہ کوئی فرعون ہو شدّاد ہو یا ہو یزید |
| حرفِ باطل کوئی ہو سب کی نفی ہے حرفِ حق |
| دارِ فانی ایک دن مٹنا ہی ہے مٹ جائے گا |
| ہاں فقط باقی رہے گا دائمی ہے حرفِ حق |
| ذکرِ حرفِ حق سے مومن کو ملیں شادابیاں |
| اور منافق کے لئے اک بے کلی ہے حرفِ حق |
| کچھ نہ تھا بس ہو کا عالم تھا خدا کی ذات تھی |
| تھا خدا میں جو نہاں جوہر یہی ہے حرفِ حق |
| حضرتِ آدم سے قائم تک جو یہ زنجیر ہے |
| اس الٰہی سلسلہ کی ہر کڑی ہے حرفِ حق |
| حضرتِ آدم کلیم اللہ موسیٰ اور نوح |
| عیسیٰ و احمد تلک ہر ہر نبی ہے حرف حق |
| حرفِ حق کے پانچ حرفی لفظ کا پیغام ہے |
| حیدری و فاطمی و پنج تنی ہے حرفِ حق |
| حیدرِ دیں رحمتِ عالم جنابِ فاطمہ |
| حضرتِ حسنین تا قائم یہی ہے حرف حق |
| چھپ کے جس نے انبیائے ماسلف کی کی مدد |
| ہو کے ظاہر ناصرِ احمد علی ہے حرفِ حق |
| آخری حج کرچکے احمد تو خُم میں یہ کہا |
| سن لو سب یہ غور سے اب آخری ہے حرفِ حق |
| حرف حق ہوں جس طرح سے میں تمہارے واسطے |
| اب تمہارے واسطے بس یہ علی ہے حرفِ حق |
| ہر کس و ناکس کا فتویٰ دین ہو سکتا نہیں |
| بس کہا معصوم نے جتنا وہی ہے حرفِ حق |
| سیدہ معلوم کرتے ہیں تری تصبیح سے |
| مرضیِٔ معبود دانوں کی لڑی ہے حرف حق |
| ہوں نہیں سکتی بیاں تفصیلِ حرفِ حق ظہیر |
| بس یہی لکھ دو مرا مولا علی ہے حرفِ حق |
معلومات