| آنکھ اب اشک ہی سے خالی ہے |
| حیف صد حیف! خشک سالی ہے |
| جچ رہا ہوں میں مسندِ غم پر |
| حالتِ زار بے مثالی ہے |
| آ گِرے گی مِری ہتھیلی پر |
| وہ دعا جو ابھی اچھالی ہے |
| تم یہ سمجھو کہ کچھ نہیں دنیا |
| شش جہت میں جو ہے، خیالی ہے |
| ناز تیرے اٹھا رہا تھا میں |
| اور انگشت ہی جلا لی ہے |
| آپ، یعنی حسِین؟ کیا کہنے! |
| آپ کو وہمِ خوش جمالی ہے |
| وہ سلیقہ شعار لڑکی ہے |
| جس سلیقے سے بات ٹالی ہے |
| دل سمجھتا ہے مر گیا شائد |
| دل سے بس آرزو نکالی ہے |
| بھوک مرتی یتیم لڑکی نے |
| آبرو بیچ کر رِدا لی ہے |
| تھل کی گرمی سے جل گئی سسی |
| سوہنی جل نے مار ڈالی ہے |
| مضطربؔ لفظ چھوڑ کر ہم نے |
| بزم سے خامشی اٹھا لی ہے |
معلومات