| دیکھ ناداں اندلسؔ، بغدادؔ کا انجام دیکھ |
| دے رہا ہے ہندؔ بھی تجھ کو وہی پیغام دیکھ |
| آگہی تاریخ سے کچھ بھی نہیں واللہ تجھے |
| ہے سرِ فہرست تیرا اے مسلماں نام دیکھ |
| کل تلک تو عالمِ بالا میں تیری دھوم تھی |
| آج اپنی نا گہی کا ہاۓ تو انعام دیکھ |
| ہے وجودِ قوم خطرے میں مگر رہبر میاں |
| باندھ کر جاتے ہوئے سوۓ حرم احرام دیکھ |
| مضطرب ہے سر پہ گر جانے کو یہ نیلا سما |
| بے خبر کی نیند دیکھو عیش اور آرام دیکھ |
| رفتہ رفتہ کیسے تجھ سے چھنتے جاتے ہیں وطن |
| کل سریا آج برما اب کی یہ آسام دیکھ |
| دو گھڑی میں آنے والی ہے مصیبت ناگہاں |
| دہر کے غافل! تحفظ کا ذرا اقدام دیکھ |
| دیکھ اپنی چشمِ دل سے عقل کے گرہوں کو کھول |
| دشت و دریا گلشن و صحرا کو خوں آشام دیکھ |
| وہ جو کرتے تھے کبھی سو جان ملت پر فدا |
| خالدِ جانباز کی اب نازکی اندام دیکھ |
| اے تماشائی تماشا گاہ سے پر لطف ہو |
| ختم ہوتا صفحۂ ہستی سے اب اسلام دیکھ |
| بزمِ عالم سے مسلماں کس طرح ناپید ہو |
| قوم کے اے نو جوانو ! فتنۂ اقوام دیکھ |
| ہو رہا ہے سرخ استقبال کا روشن افق |
| رفتہ رفتہ رنگ بدلتے گردشِ ایام دیکھ |
| با خبر کردے قیامت خیز نظاروں سے تو |
| اے کہ شاعر آ رہے ہیں مجھ کو یہ الہام دیکھ |
| صبحِ مومن سارے نظارے لیے گم ہو گئی |
| عالمِ اسلام کی ڈھلتی ہوئی اب شام دیکھ |
| واۓ ناکامی یہ حسرت دل گرفتہ بادہ نوش |
| مے کدہ ویران ہے ساقی کے لب پر جام دیکھ |
| جرمِ بادہ خواری کی کیا یہ سزا ہے ساقیا |
| اپنے رندوں کی ذرا تو حسرتِ ناکام دیکھ |
| خانماں آباد مے خانے کو یہ کرکے تباہ |
| بادہ نوشوں کے لہو کا بہتا دریا عام دیکھ |
| دے دلِ مومن میں پھر وہ جذبۂ سیلِ رواں |
| ہیں مسلط تیرے بندوں پر یہ ہندی فام دیکھ |
| مٹ رہی ہے بزمِ احمدؐ اے خدا تو بھی تو دیکھ |
| ہنس رہے ہیں کیوں صنم خانے میں اب اصنام دیکھ |
| کس بھیانک موڑ پر ہے ہندؔ کی شاہیؔ نسل |
| آٹھ سو سالہ حکومت کا ذرا اتمام دیکھ |
معلومات