| راگ الفت کا چھیڑ آدھی رات |
| اپنے دُکھڑے سہیڑ ، آدھی رات |
| گر کے سجدے میں گریہ زاری کر |
| تُو کواڑوں کو بھیڑ ، آدھی رات |
| وہ جو دل میں گناہ راسخ ہیں |
| ان کو جڑ سے اکھیڑ ، آدھی رات |
| اگلی نسلوں تلک وہ پھل دیں گے |
| بو جو نیکی کے پیڑ ، آدھی رات |
| دن گزر جائے کارِ دنیا میں |
| دل کے جھگڑے نبیڑ ، آدھی رات |
| سچی جھوٹی کہانیاں ساری |
| ذہن میں مت گھسیڑ ، آدھی رات |
| معرفت کے نکات تک پہنچے |
| دے تخیّل کو ایڑ ، آدھی رات |
| وسوسے تنگ جو کریں طارق |
| ان کے بخیے ادھیڑ ، آدھی رات |
معلومات