| جب بھی کوئی دوست زخموں کی دوا دینے لگا |
| میرا دل موہوم شعلوں کو ہوا دینے لگا |
| مے گساروں سے بچا تو زاہدوں میں پھنس گیا |
| جب ذرا قربت بڑھی ہاتف صدا دینے لگا |
| مجھ کو مال و زر سے تُو نے تب نوازا اے خدا |
| جب مرا افلاس بھی مجھ کو مزا دینے لگا |
| اتنی جِدّ و جُہد سے جس کو بھلایا تھا کہ آج |
| ایک بوسیدہ سا خط اس کا پتہ دینے لگا |
| میری خوشحالی کا قِصّہ جب فرشتوں نے سنا |
| اک فرستادہ وہیں پر بد دُعا دینے لگا |
| گرچہ ناکارہ سہی لیکن نہیں ہوں نا سمجھ |
| میرا حِصّہ چھین کر کس کو ضیا دینے لگا |
| کل تلک جو چھینتا تھا تیری لاشوں کے کفن |
| آج اے غافل تجھے وہ کیوں ردا دینے لگا |
| شورشِ احوال پر الفاظ کم پڑنے لگے |
| حلقۂ عرفان و ایقاں بھی دغا دینے لگا |
| تُو نے پُوری نسلِ انسانی کو شرمندہ کیا |
| پستئی انسان پر کعبہ صدا دینے لگا |
| ڈھل گئی شامِ مسافر ہو گیا رستہ تمام |
| حشر کے میدان میں ہاتف صدا دینے لگا |
| آخری منزل پہ آ کے کھُل گئیں آنکھیں امید |
| اب تو لفظوں کا مسیحا بھی دغا دینے لگا |
معلومات