| ہمارے دَرمیاں حائل جو پَردہ چاک ہو جائے |
| تو اُس جانِب چُھپا کیا ہے یِہ سَب اِدراک ہو جائے |
| اُسے تو پِھر دُعاؤں کی کوئی حاجت نَہِیں رَہتی |
| وہ جِس پر مہرباں میرا شَہِ لولاک ہو جائے |
| مُجھے اَیسا لَگے میں بھی مَدینے ہو کے آیا ہُوں |
| یِہ دِل اِن سَب گُناہوں سے اگر جو پاک ہو جائے |
| بُہت سارے مسائل ایک ہی چُٹکی میں حَل سَمجھو |
| دِلِ بُزدِل ذرا سا بھی اگر بیباک ہو جائے |
| جو میں نے اَب کے ٹھانی ہے میں وہ کر کے رَہوں گا اَب |
| اُسے کَہنا کہ جِتنا ہو سَکے سَفَّاک ہو جائے |
| کَبھی جی چاہتا ہے اَب یِہ سَب کُچھ اور بھی سَنورے |
| کَبھی جی چاہتا ہے اَب یِہ سَب کُچھ خاک ہو جائے |
| ہمیں اُس سے مَحبَّت تھی یِہ عُقدہ تَب ہی کُھلتا ہے |
| کِسی کی یاد میں جَب آنکھ بھی نَمناک ہو جائے |
| ہمارے دُشمَنوں پَر بھی ہمارا خوف لازِم ہے |
| ہمارے دوستوں پَر بھی ہماری دھاک ہو جائے |
| چلو کُچھ دِن تو مرزا جی تَصنُع میں گُذاریں ہَم |
| چلو کُچھ دِن ہماری بھی تو اُونچی ناک ہو جائے |
| (مرزا رضی اُلرّحمان) |
معلومات