| اُٹھا کے ہاتھ ترے واسطے دعا کرتا |
| اے شاہِ وقت اگر تُو کوئی بھلا کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| وہ ایک پھُول تھا اور میں اُسی کی خوشبو تھا |
| خدا ہمیں نہ کبھی اس طرح جدا کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| مرا نصیب مرے ہی خلاف لڑتا ہے |
| میں کاش اس کو نہ جیون میں یوں خفا کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| بس ایک آخری خواہش یہ میرے دل کی تھی |
| میں کام نیکی کے دنیا میں ہر جگہ کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| اسی امید پہ بیٹھا تھا اُس کی چوکھٹ پر |
| کبھی تو مجھ پہ کرم کی وہ اک نگہ کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| بھٹکنے والوں کو رستہ دکھانا لازم تھا |
| اندھیری رات میں روشن کوئی دیا کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| خدا کی ذات پہ تُو کچھ یقین رکھتا جو |
| تو عمر بھر ہی ترے ساتھ وہ وفا کرتا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| بھلا دیا ہے ہر اک زخم دیکھ لو مانؔی |
| معاف کر تو دیا ہے میں اور کیا کرتا |
معلومات