| گر دیکھنا ہو نقشہ انساں کی حالتوں کا |
| کھُل کر بیاں کیا ہے قرآں نے بھید سارا |
| انساں کی حالتوں کے سر چشمے نفس ہیں جو |
| امّارہ وحشیوں سا کر دے عمل ہمارا |
| لوّامہ کی ملامت روکے گنہ سے اکثر |
| پر نفسِ مطمئنّہ کے بِن نہیں گزارا |
| لوّامہ جب دکھائے انساں کو سیدھا رستہ |
| اخلاق اس میں تب ہی آتے ہیں رفتہ رفتہ |
| ہے نفسِ مطمئنّہ معراج آدمی کی |
| ہو جائے جس کو حاصل پھر وہ نہیں بدلتا |
| امّارہ سے حفاظت تُجھ کو ملے نہ جب تک |
| کب چین دل کو آئے کب روح پر ہو دستک |
| اے نفسِ مطمئنّہ تُو بھی تو ہو میسّر |
| لوّامہ میں گزاریں گے زندگی یہ کب تک |
| رحماں سے گر محبّت شیطاں سے بیر ہو گا |
| انجام تیرا اک دن آخر بخیر ہو گا |
معلومات