| ہر اک دعا میں ہر اک آرزو میں شامل ہے |
| وطن کا عشق ہمارے لہو میں شامل ہے |
| کریں برائے وطن اپنی جان بھی قرباں |
| اسی نماز کی نیت وضو میں شامل ہے |
| اسی کی خوشبو سے مہکی ہے میری خاموشی |
| وطن کا تذکرہ ہر گفتگو میں شامل ہے |
| عروج سبز ہلالی کا دیکھنا ہے مجھے |
| یہی تمنا مری جستجو میں شامل ہے |
| بلادِ غیر کے نشّے سے رکھتا ہے محفوظ |
| یہ جامِ عشقِ وطن جو سبو میں شامل ہے |
| ملے ہیں زخم جو اپنوں سے پیاری دھرتی کو |
| ہماری سعی بھی اس کے رفو میں شامل ہے |
| شرابِ حبِ وطن ہے مری رگوں میں قمرؔ |
| مثالِ رزق بدن کی نمو میں شامل ہے |
| قمرآسیؔ |
معلومات