| نعت |
| عقل کو وجداں سکھایا آپﷺ کی تعلیم نے |
| آشنا رب سے کرایا آپﷺ کی تعلیم نے |
| لائقِ سجدہ نہیں رب کے سوا کوئی یہاں |
| بندگی کرنا سکھایا آپﷺ کی تعلیم نے |
| فاتحہ تا ناس اک دانش کدہ ہے القراں |
| راستہ سیدھا دکھایا آپﷺ کی تعلیم نے |
| سب زمین و آسماں جس نے منور کر دیئے |
| قمقمہ ایسا جلایا آپﷺ کی تعلیم نے |
| پر جلیں جس جا فرشتوں کے وہاں پہنچا دیا |
| آدمی انساں بنایا آپﷺ کی تعلیم نے |
| روم و فارس کو تہ و بالا کیا ایام میں |
| معجزہ وہ بھی دکھایا آپﷺ کی تعلیم نے |
| کربلا میں سر کٹانے پر نہ جھکنے کا سبق |
| ظلم سے لڑنا سکھایا آپﷺ کی تعلیم نے |
| رنگ و خوں یا پھر لسانی فرق ہی بنیاد ہیں |
| تفرقہ سارا مٹایا آپﷺ کی تعلیم نے |
| بغض، کینہ، وسوسے سب سے شفا کامل ملی |
| دل کئے ایسے مُصفا آپﷺ کی تعلیم نے |
| آدمی آزاد ہے فکر و عمل میں ہر طرح |
| جبر کو غاصب بتایا آپﷺ کی تعلیم نے |
| اب جو حاصل ہے فروغ آزادیِ جمہور کو |
| یہ خمیر اصلاً اٹھایا آپﷺ کی تعلیم نے |
| دشمنی بھی ختم ہو سکتی ہے حُسنِ خُلق سے |
| یہ سلیقہ بھی سکھایا آپﷺ کی تعلیم نے |
| آپﷺ نے ہم کو سکھائے بادشاہی کے ہنر |
| شہ گداؤں کو بنایا آپﷺ کی تعلیم نے |
| گنبدِ خضرا علامت آپ کے افکار کی |
| دشت میں گلشن کھلایا آپﷺ کی تعلیم نے |
| جاہلیت کی علامت شہر مکہ تھا جسے |
| نور کا مرکز بنایا آپﷺ کی تعلیم نے |
| فخر سے مرشد یہ بولے چوم لوں تیرا قلم |
| مرتبہ عالی دلایا آپﷺ کی تعلیم نے |
| رب کی نظروں میں شہاب احمد برابر ہیں سبھی |
| عدل کو ممکن بنایا آپﷺ کی تعلیم نے |
| شہاب احمد |
| ۱۷ ستمبر ۲۰۱۸ |
معلومات