| شفیع المذنبیں ؐ کہيے، انہیں شمس الضحی ؐ کہیے |
| حبیب کبریا ؐ کہیے، انہیں روحی فدا ؐ کہیے |
| رسالت کے، نبوت کے امام لانبیا ؐ کہیے |
| "جب ان ؐ کا نام آئے مرحبا صل علی ؐ کہیے" |
| سر محفل بیاں کر دے جو کوئی سیرت آقا ؐ |
| تقاضائے عقیدت میں سبھی بدر الدجی ؐ کہیے |
| وحی نازل ہوئی جن ؐ پر ہوا قرآن بھی نازل |
| انہیں سرکار دو عالم ؐ، جناب مصطفی ؐ کہیے |
| جہاں میں آپ ؐ ہیں شق القمرکے معجزہ آرا |
| وہی ہیں سید الابرار ؐ، شاہ دو سرا ؐ کہیے |
| شرف حاصل ہوا ہے جن ؐ کو رب سے ہم کلامی کا |
| انہیں سب احمد مختار ؐ، شاہ مجتبی ؐ کہیے |
| مکمل ہو گیا ہے دین کملی والے ؐ پر ناصؔر |
| کہ فخر کون و مکاں ؐ وہ ہیں انہیں نور الہدی ؐ کہیے |
معلومات