| خونِ جگر سے شمع جلائی گئی ابھی |
| تازہ ترین نظم سنائی گئی ابھی |
| یک بار حظ اٹھائیے عمرِ تمام کا |
| اس واسطے ہی بزم سجائی گئی ابھی |
| کانوں میں گونجتی ہے ابھی بازگشتِ کن |
| دنیا کوئی نئی سی بنائی گئی ابھی |
| اللہ حسنِ یار کی عشوہ طرازیاں |
| اک تار سازِ دل کی ہلائی گئی ابھی |
| کیونکر کلام سنتے ہی چہرے کے رنگ اڑے |
| لفظوں سے دل کی تال ملائی گئی ابھی |
| ترکِ تعلقات کا پیغام مل چکا |
| یعنی کہ پھر سے بجلی گرائی گئی ابھی |
| تو نے عجیب وقت پہ ملہار چھیڑ دی |
| اک بے نوا کی لاش اٹھائی گئی ابھی |
معلومات