| کرتا ہے عرض آقا عاجز غلام تیرا |
| بگڑی بنائیں سرور یہ بردہ خام تیرا |
| طاری رہے زباں پر، جب تک ہے سانس جاری |
| روشن رکھے یہ سینہ تاباں ہے نام تیرا |
| رحمت محیط تیری ڈوبے جہان اس میں |
| کرتی ہے ذکر ہستی شاہا دوام تیرا |
| اعلیٰ ملے ہیں درجے میرے کریم تجھ کو |
| رب کے حبیب پیارے، اعلیٰ مقام تیرا |
| پرواز نوریوں کی سدرہ پہ جا رکی تھی |
| اوجِ فلک پہ جا کر ٹھہرا ہے گام تیرا |
| اقصیٰ میں ملنے آئے تجھ کو نبی خدا کے |
| خوش انبیاء کو آیا بننا امام تیرا |
| بھولے نہ آپ ہم کو قوسین خلوتوں میں |
| آیا ہے اُمتی کو آقا سلام تیرا |
| ملتے ہیں تجھ سے قاسم، انعامِ یزداں سارے |
| بستر مگر چٹائی سادہ طعام تیرا |
| تھا دَور ظلمتوں کا، تھے انساں نام کے ہم |
| نورِ ہُدی دہر میں، لایا نظام تیرا |
| تیری عطا عوامی، تیرے گدا ہیں سارے |
| قادر کے گنجِ پنہاں سے، فیض عام تیرا |
| محمود خوش ہے داتا بابِ سخا پہ تیرے |
| کونین کو ہے باڑا ملتا تمام تیرا |
معلومات