| خدا نے تجھ کو عطا کتنی نعمتیں کی ہیں |
| کہ اپنے بندے سے بے حد محبّتیں کی ہیں |
| میں سوچتا ہوں سبب اس کا ہو گا کچھ آخر |
| کہ اس نے مانگے بنا ہی تو رحمتیں کی ہیں |
| مری حقیر سی کوشش کو بھی نوازا ہے |
| معاف کر کے خطائیں عنایتیں کی ہیں |
| قدم قدم پہ مجھے راستہ دکھایا ہے |
| جہاں پہ بھول گیا ہوں ہدایتیں کی ہیں |
| دلوں میں اوروں کے ڈالا مری محبّت کو |
| مرے نصیب میں ایسے بھی الفتیں کی ہیں |
| کبھی جو نفرتوں نے دل میں سر اٹھایا ہے |
| تو اس نے صاف دلوں سے کدورتیں کی ہیں |
| دلوں میں تو نے ہی احساس یہ جگایا تھا |
| یہ والدین نے مجھ پر جو شفقتیں کی ہیں |
| یہی ہے کام فرشتوں کا سو وہ کرتے ہیں |
| میں کیسے ان سے کہوں کیوں شکایتیں کی ہیں |
| کہیں جو آئیں کبھی آزمائشیں مجھ پر |
| مرے لئے سبھی آساں مصیبتیں کی ہیں |
| کیا ہے صرفِ نظر میری لغزشوں سے بھی |
| قبول اس نے جو اکثر عبادتیں کی ہیں |
| ہے طارق اس کی محبت کا یہ بھی اک انداز |
| تبھی تو اجر کا باعث صعوبتیں کی ہیں |
معلومات