| تاج والے سب ترے احسان پر موقوف ہے |
| تیرا ذکرِ خیر بھی ایمان پر موقوف ہے |
| بس میں ہو تو یہ جہاں کیا ہر جہاں میں وار دوں |
| ہائے لیکن زور تو اک جان پر موقوف ہے |
| کل حقیقت تیری نا جانی کسی بھی فرد نے |
| جس نے جو مانا وہ سب عرفان پر موقوف ہے |
| یہ اوامر اور نواہی ساختہ ہوتے نہیں |
| حکمِ خالق سر بہ سر قرآن پر موقوف ہے |
| آکہ مل کر ہم سجائیں ذکرِ حق کی محفلیں |
| ذکرِ مولودُ النبی کب آن پر موقوف ہے |
| رحمت و برکت کا منبع ہے ربیع النور بھی |
| یہ نہ سمجھو صائمو رمضان پر موقوف ہے |
| جس کی جو اوقات ہو اتنی خوشی برپا کرے |
| جشنِ شہ کب عیش کے سامان پر موقوف ہے |
| اے خدا کے فضل کے طالب بس اتنا جان لے |
| فضل ذکرِ شاہِ انس و جان پر موقوف ہے |
| ذکرِ محبوبِ خدا ہے عین ذکرِ کبریا |
| بے نبی ذکرِ خدا نقصان پر موقوف ہے |
| لذتِ دنیا سے بڑھ کر لذتِ عشقِ نبی |
| یہ وصال و ہجر تو جانان پر موقوف ہے |
| جن دلوں میں عشقِ احمد کی کرن مفقود ہے |
| ان دلوں کا حال بھی طغیان پر موقوف ہے |
| ان کی رحمت فضل و احساں عام ہے سب کے لئے |
| کون پاتا ہے اسے انسان پر موقوف ہے |
| وہ تو مائل دید پر ہیں دیدہ ور کوئی تو ہو |
| ان کے جلوے دیکھنا اوسان پر موقوف ہے |
| جنبشِ ابرو سے جل جائیں امیدوں کے چراغ |
| بندشِ غم کھولنا مسکان پر موقوف ہے |
| اس غبارِ راہ میں ہیں خلد کی سب راحتیں |
| دل کی تسکیں عشق کے میزان پر موقوف ہے |
| آخرش جائے جہنم میں یا جامی خلد میں |
| اس کی مرضی جو کرے رحمٰن پر موقوف ہے |
معلومات