| غزل |
| حسن سے جب دُو بہ دُو ہونے لگی |
| زندگی کی جستجو ہونے لگی |
| التفاتِ یار کے ادراک پر |
| ہر نظر جام و سُبو ہونے لگی |
| گرچہ برَسوں سے نہیں تھا رابطہ |
| رَوز پہروں گفتگو ہونے لگی |
| دیر تک بیٹھیں ہو لمبی گفتگو |
| من میں پھر یہ آرزو ہونے لگی |
| رَوز اَفزوں ہے ہماری دوستی |
| “آپ سے تم ، تم سے تو ہونے لگی” |
| چوم لوں پرُ اَز تبسم لَب حسیں |
| دل ہی دل میں آرزو ہونے لگی |
| دیکھ کر بگڑے ہوئے تیور ترے |
| آرزو دل میں لہو ہونے لگی |
| آج کل کے پر گھٹن ماحول میں |
| آرزو کی آرزو ہونے لگی |
| پھاڑ ڈالا جوش وحشت نے اسے |
| جب گریباں کی رَفو ہونے لگی |
| موسمِ گُل پھر سے رخصت ہو گیا |
| پھر گریباں کی رفو ہونے لگی |
| چشمِ نم تو نے عبث رسوا کیا |
| آبرو بے آبرو ہونے لگی |
| زندگی جینا ہوا دشوار تر |
| صنعتوں میں جب نمو ہونے لگی |
| بڑھ گئی اتنی مشقت رات دِن |
| دو گھڑی کی آرزو ہونے لگی |
| آدمی فولاد میں ڈھلنے لگے |
| آہنی انساں کی خُو ہونے لگی |
| کار خانہ زندگی کا رک گیا |
| آئینوں سے گفتگو ہونے لگی |
| خوف میں جکڑی ہوئی انسانیت |
| ڈٹ گئی تو سرخرو ہونے لگی |
| جس قدر خوفِ خدا بڑھتا گیا |
| فکرِ انساں میں بھی ضُو ہونے لگی |
| خُوب کہتاہے شہاب احمد غزل |
| گفتگو یہ کو بکو ہونے لگی |
| شہاب احمد |
| ۲۹ اپریل ۲۰۲۰ |
| رمل مسدس محذوف |
| فاعِلاتن فاعِلاتن فاعِلن |
معلومات