| زیست! جو طرزِ گماں سے کسی فنکاری میں |
| آدھی مشکل میں ڈھلی آدھی اداکاری میں |
| آج پھر ایک ہواۓِ شبِ ناداری میں |
| ایک اور سال ڈھلا حالتِ بےزاری میں |
| ہاں وہ ہر سلسلۂِ عہدِ وفا تھا بے سود |
| ہاں وہ ہر منزلِ قربت کا گِلہ بود نبود |
| ہاں وہ ہر ذوقِ شاناسائی نے برباد کیا |
| ہاں وہ ہر لمحۂِ گویائی نے ناشاد کیا |
| ہاں وہ ہر خواب مرا نیند کی الجھن میں رہا |
| ہاں وہ ہر شب کا گِلہ جاگتی آنکھوں نے سہا |
| ہاں وہ ہر ہستئِ نَخوت سے گریزاں ہی رہے |
| پابجولاں بھی چلے، خصلتِ انساں سے پَرے |
| ہاں وہ احباب بچھڑنے کے تھے اک روز مگر! |
| پُرسکوں ہوۓ یوں بھی خانۂِ دل کے منظر |
| آج پھر چھوڑ چلا ہوں میں اسی سال کے ساتھ |
| کئی احباب! کسی رنج کی تمثال کے ساتھ |
معلومات