| آہ ! مسلم ! گلستانِ ہند کے اے نسترن |
| خون سے رنگین ہے کیوں تیرا گُل گوں پیرہن |
| جبر و استبداد کا کیسا سماں ہے ہندؔ میں |
| ظلم کی دہشت سے لرزاں ہے وہاں کوہ و دمن |
| شاہراہوں کی ہے زینت طفلِ گہوارہ وہاں |
| کیا قیامت آئی ہے بے گھر ہوئے ہیں مرد و زن |
| آہ ! تجھ سے کیا کہوں اے شاعرِ آتش نوا |
| خاک و خوں ہے ملتِ اسلامیہ در ایں چمن |
| ملک و ملت کی حفاظت میں رہے جو پیچھے ہم |
| عظمتِ رفتہ ہوئی ہے آج ہم پر طعنہ زن |
| ہاہاکاری ، افراتفری ، ہاۓ و ہو ، چیخ و پکار |
| نالہ و شیون سے قائم ہے یہاں کی انجمن |
| تنگ ظرفی دیکھیے اس قوم کے افراد کی |
| ہم جنہیں کہتے نہیں تھکتے کبھی بھی ہم وطن |
| آٹھ سو سالہ مروت کا یہی انعام ہے |
| دے رہے ہیں یہ ہراک احسان کے بدلے کفن |
| گویا ہندوستاں نہیں یہ کوئی گورستان ہے |
| مسلموں کے خون میں ڈوبا ہوا ہے یہ وطن |
| پا نہیں سکتا کبھی وہ دہر میں اعلی مقام |
| جل رہا ہو جس وطن میں بے کسوں کا تن بدن |
| لٹ رہی ہے آبرو بھی ملکِ ہندوستان کی |
| حرکتوں پر ان کی ہیں اقوامِ عالم خندہ زن |
| ہے مرے بحرِ تخیل میں یہ شاہؔی موجزن |
| "کیسے ہوگا ملک راہِ ارتقاء پر گامزن" |
معلومات