| مبارک ہو تمہیں یہ دن مبارک ہو یہ نظّارا |
| سجی محفل کھلے چہرے مہک اٹھّا چمن سارا |
| پرانے دن پرانی وہ شرارت یاد آتی ہے |
| وہی بچپن وہی قصّے رفاقت یاد آتی ہے |
| کبھی گِلّی کبھی کنچے کبھی میدان سجتا تھا |
| کبھی کوئی کسی ساتھی کی باری چھین لیتا تھا |
| جوانی کے حسیں قصّے شرارت کے وہ افسانے |
| لبوں پر ہیں سبھی یاروں کے اس کے گیت اور گانے |
| جوانی کی شرارت پر ابھی تک مسکراتے ہیں |
| چھپائے تھے کبھی جو خط، وہ اب کھل کر سناتے ہیں |
| کسی ساتھی کی رخصت پر بہت آنسو بہائے اور |
| کسی ساتھی کی شادی پر بہت ہم نے مچایا شور |
| کسی کو کام کی الجھن کسی کو فکر بچوں کی |
| کسی کو فکر ہے گھر کی کسی کو فکر اپنوں کی |
| کمائی کی تَگاپُو میں ٹھکانے بھی بدلتے ہیں |
| جدائی کے زمانے بھی رفاقت میں گزرتے ہیں |
| سبھی ساتھی چلے آئے محبت کھینچ لائی ہے |
| پرانی دوستی پھر سے نئی محفل میں آئی ہے |
| تمہیں پا کر سبھی ساتھی پرانے رنگ لائے ہیں |
| بڑی مدّت کے بچھڑے آج ملنے کو تو آئے ہیں |
| تمہارا گھر سدا مہکے، محبت کا بسیرا ہو |
| تمہاری ہر نئی صبحوں میں خوشیوں کا سویرا ہو |
| رہے دونوں کے ہونٹوں پر دعا بھی، مسکراہٹ بھی |
| بڑھے ہر دن محبت بھی، بڑھے ہر دن رفاقت بھی |
| حسنؔ دل سے دعا گو ہے، سلامت یہ رفاقت ہو |
| تمہارے واسطے ہر دن مسرّت کی بشارت ہو |
معلومات