| خود کو عرفان میں ڈھالوں تو کہیں نعت کہوں |
| چادرِ حمد اُڑھا لوں تو کہیں نعت کہوں |
| بارشِ لطف و عنایات کا موسم ہے یہاں |
| معتبر لفظ اٹھا لوں تو کہیں نعت کہوں |
| تیرے محبوب کی مدحت میں بدن لرزاں ہے |
| اے خدا خود کو سنبھالوں تو کہیں نعت کہوں |
| وادئ مدحتِ حضرتؑ میں قدم رکّھا ہے |
| اِذن عمرانؑ سے پا لوں تو کہیں نعت کہوں |
| حمد کے لفظ میں مُضمَر ہے محمدؑ کی ثنا |
| اک قدم اور بڑھا لوں تو کہیں نعت کہوں |
| سورۂ طہ و مُدَّثِّر و مُزَّمِّل و یاسیں |
| ان کے بس ناز اٹھا لوں تو کہیں نعت کہوں |
| خارجِ قدرتِ عاصی ہے ثنائے احمدؑ |
| انبیاء کو بھی بلا لوں تو کہیں نعت کہوں |
| چند اشعار پئے حمدِ الھی پڑھ کر |
| پہلے محفل تو جما لوں تو کہیں نعت کہوں |
| میری تہذیبِ کَم عِلمی نے سکھایا ہے مجھے |
| سر پہ قرآن اٹھا لوں تو کہیں نعت کہوں |
| اپنے فرسودہ خیالات کو بہتر کر کے |
| حمد پہ میم سجا لوں تو کہیں نعت کہوں |
معلومات