| سدا سے ہی مرے دل کو، بہت پیاری مری بہنیں |
| زمانے کی نگاہوں سے، بڑی نیاری مری بہنیں |
| خداوندا سلامت رکھ، انہیں ہنستا ہوا ہر دم |
| لٹاتی ہیں مرے اوپر، وفا ساری مری بہنیں |
| جہاں کے ان خزانوں سے، مجھے بڑھ کر لگی ہیں یہ |
| کہ دنیا کی ہر اک شے سے، لگیں بھاری مری بہنیں |
| مرے حق میں دعائیں یوں، خدا سے کر رہی ہیں یہ |
| سدا لب پر دعاؤں کو، رکھیں جاری مری بہنیں |
| مجھے جب بھی حزیں پائیں، گلے سے لگ کے روتی ہیں |
| مرے اوپر سدا سے ہی، رہیں واری مری بہنیں |
| زمانہ گر خفا مجھ سے، ہوا تو کچھ نہیں پروا |
| کریں گی ہر گھڑی میری، طرف داری مری بہنیں |
| کبھی مجھ پر غموں کا گر، پڑے سایہ تو یہ فوراً |
| کریں دل سے مری آ کر، یہ دل داری مری بہنیں |
| سدا ہی دل میں رکھتی ہیں، محبت ہی محبت یہ |
| نبھائیں گی سدا دل سے، وفا داری مری بہنیں |
| مری مشکل میں جب کوئی، نہیں ہوتا مرے ہمراہ |
| دکھاتی ہیں ہمیشہ ہی، مدد گاری مری بہنیں |
| مرے گھر جب کبھی آ کر، گلے مجھ سے یہ ملتی ہیں |
| خوشی دل پر مرے کر دیں، سدا طاری مری بہنیں |
| دعا یہ دے رہا ہے شادؔ، رب ان کو سلامت رکھ |
| بڑی سچی نبھاتی ہیں، عجب یاری مری بہنیں |
معلومات