| خلافت علیٰ منہاج النبوّة |
| جو منہاجِ نبوّت پر ہے قائم اُس خلافت کو |
| خدا نے خود چنا ، دنیا میں اپنی اِس قیادت کو |
| پھلا پھولا شجر یہ بڑھ گئیں شاخیں جہاں بھر میں |
| جہاں والوں نے دیکھا کام کرتے دستِ قدرت کو |
| خلافت نے عدُو کو جیسے للکارا سرِ میداں |
| کہ دنیا بھر سے آئی پھر صدا ، دادِ شجاعت کو |
| خلافت ہے وہ حبلُ اللہ ، چمٹ جاتے ہیں لوگ اس سے |
| خود اپنی اور آنے والی نسلوں کی حفاظت کو |
| خلافت کی اطاعت ، جزو ایماں کا سمجھتے ہیں |
| کہ اِس کے ماننے والے ہی سمجھے عہدِ بیعت کو |
| خدا سے جوڑ کر ، مخلوق کی خدمت کا بتلایا |
| مقام اس نے دیا ہے اک نیا ، ربّ کی عبادت کو |
| رسائی عرش تک ہوتی نہیں ہے اس کو گر چھوڑیں |
| قبولیّت ملے جو اس تعلّق سے ریاضت کو |
| اماں پانے کو دنیا میں حصار اس کو بنایا ہے |
| بنا کر ڈھال بھیجا ہے خدا نے اس امامت کو |
| ہمارا کام ہے سُن کر اطاعت ہر قدم پر ہو |
| چلے جو اس کے پیچھے ، ڈر نہ ہو گا پھر قیامت کو |
| خلافت نے دلوں میں گھر کیا ہے اس طرح طارقؔ |
| سمجھ پائے گی کیا دنیا ، خلافت کی محبّت کو |
معلومات