آیا نہ ہو گا اس طرح حُسن و شباب ریت پر |
گلشنِ فاطمہ کے تھے سارے گلاب ریت پر |
آلِ بتول کے سوا کوئی نہیں کھلا سکا |
قطرۂ آب کے بغیر اتنے گلاب ریت پر |
عشق میں کیا بچائیے، عشق میں کیا لٹائیے |
آلِ نبی نے لکھ دیا سارا نصاب ریت پر |
جتنے سوال عشق نے، آلِ رسول سے کئے |
ایک کے بعد اِک دئے، سارے جواب ریت پر |
پیاسا حسین کو کہوں اتنا تو بے ادب نہیں |
لمسِ لبِ حسین کو، ترسا ہے آب ریت پر |
آلِ نبی کا کام تھا، آلِ نبی ہی کر گئے |
کوئی نہ لکھ سکا ادیبؔ، ایسی کتاب ریت پر |
معلومات