| ہوئے آزردہ ،حزیں ، قافلۂ چرخ نشیں |
| مضطرب اخترِ شب ، محوِ فغاں ماہِ مبیں |
| اشک آباد ہوا کارگہِ نیلوفریں |
| دیکھ کر رنگِ فلک کہنے لگے اوج مکیں |
| تیرہ و تار ہے دنیا تہِ خورشیدِ جہاں |
| منتظر شامِ ستم جس کی ہے وہ صبح کہاں |
| منزلِ دَہر میں وہ مہدیٔ موعود نہیں |
| شاہدِ عدل نہیں ، ہستیٔ مشہود نہیں |
| توپِ طالوت میں وہ آتش و بارود نہیں |
| آہ ! اس لشکرِ حق میں کوئی داؤد نہیں |
| پھر اٹھے مشرق و مغرب سے سلیمان کوئی |
| دجلہ و نیل سے ہنگامۂ طوفان کوئی |
| شوکتِ داخل و ناصر خس و خاشاک ہوئی |
| سطوتِ ہارون و مامون بھی اب خاک ہوئی |
| خلعتِ عظمتِ عثمان بھی صد چاک ہوئی |
| شانِ ملت نذرِ گردشِ افلاک ہوئی |
| کھو گیا جذبۂ تسخیرِ جہاں گیر کہیں |
| خوگرِ عزم ہوئے آہ ! کہ محرومِ یقیں |
| ہم پے بھی لطف و کرم اے شہِ شاہاں کردے |
| ان درندوں کو بھی اب محرمِ انساں کردے |
| شعلہ زاروں کو بھی خوش رنگ گلستاں کردے |
| رہ نشینوں کو بھی پھر دہر میں سلطاں کردے |
| " جوئے خوں می چکد از حسرتِ دیرینۂ ما |
| می تپـد نالہ بہ نشتــر کدۂ سیـنۂ ما " |
معلومات