| اس کی نگاہِ ناز بڑا کام کر گئی |
| میری زمینِ دل کو محبت سے بھر گئی |
| اس نے ادائے ناز سے دیکھا مری طرف |
| ایسا لگا زمین کی گردش ٹھہر گئی |
| آؤ کہ تم کو لیلی کے قصے سناؤں میں |
| وہ بھی جنونِ عشق میں کیا کیا نہ کر گئی |
| کرب و الم، محبت و شوقِ وصالِ یار |
| ان مشغلوں میں ساری جوانی گزر گئی |
| لوگوں کے عیب دیکھ کے اترا رہے ہیں ہم |
| لیکن نہ خود کے حال پر اپنی نظر گئی |
| اس کو تمیز تھی نہ حرام و حلال کی |
| اس واسطے وہ میری نظر سے اتر گئی |
| میں نے ہی التفات کی اس پر نظر نہ کی |
| دنیا مرے قریب سے ہو کر گزر گئی |
| اک بات راز کی جو بتانی تھی آپ کو |
| احسنؔ وہ بات دھیان سے میرے اتر گئی |
معلومات