.jpg)
| تِرے عِشق کا گَر اُجالا نہ ہوتا |
| جَہاں میں کوئی حُسن والا نہ ہوتا |
| تِرا حُسنِ فطرت نُمایاں نہ ہوتا |
| زَمیں پہ کوئی عِشق والا نہ ہوتا |
| تِرے حُسن کا آئینہ گَر نہ ہوتا |
| مِرا کَیفِ بینی دُبالا نہ ہوتا |
| تِرا نُور خاکی لِبادہ نہ کرتا |
| بَشر کا کبھی بول بالا نہ ہوتا |
| تِرا دَم نہ ہوتا مِرے دَم میں شامل |
| مِرا دَم مَلائک سے اعلٰی نہ ہوتا |
| زَمیں پر تِرا گَر خَلیفہ نہ بَنتا |
| مِرا خُلد سے یُوں نِکالا نہ ہوتا |
| سِماتا نہ مُجھ میں تِرا رنگِ احسن |
| مِرا رنگِ اُلفت نِرالا نہ ہوتا |
| تِری دِید کی مُجھ کو مَستی جو مِلتی |
| مِرے ہاتھ مَے کا پیالا نہ ہوتا |
| تِرے عَرش کو یہ بَرابر ہِلاتا |
| اَگر دِل کو میں نے سَنبھالا نہ ہوتا |
| دِلِ بے سکوں کو سکوں کیسے مِلتا |
| تِری یاد میں اِس کو ڈھالا نہ ہوتا |
| مِرے گِرد رَقصاں دو عالَم یہ ہوتے |
| اَگر میں اَسیرِ نِوالہ نہ ہوتا |
| مُجھے کِنزِ مَخفی کا عِرفاں نہ مِلتا |
| اگر لَب پہ میرے یہ تالا نہ ہوتا |
| عَدم سے ہوں آیا، عَدم کو ہی جاتا |
| اَگر وصلِ ذاتِ تَعالٰی نہ ہوتا |
| سَرِ حَشر میرا بَھرم کیسے رہتا |
| اَگر مُصطفٰیؐ کا حَوالہ نہ ہوتا |
معلومات