| رات تو تیرہ تھی لیکن دن بھی اب تاریک ہے |
| یا اگر کچھ فرق باقی ہے تو بس باریک ہے |
| بے سبب غیروں کی باتوں میں نہ یوں آیا کرو |
| مَیں تو ہوں نزدیک تر تُو اور بھی نزدیک ہے |
| جب کبھی غُصّہ انہیں آئے تو واللہ صبر کر |
| کیونکہ یہ غُصّہ نہیں ہے چاہتوں کی بھیک ہے |
| چونچلے تھے سب جوانی کے فدا ہر ایک پر |
| لیکن اب تو شکر ہے کافی طبیعت ٹھیک ہے |
| ہر طرف ناز و ادا کی حسن کی جولانیاں |
| مجھ کو لگتا ہے یہ ساری حُسن کی تحریک ہے |
| غمزہ و شوخی ادا میں اب نہیں آنے کے ہم |
| لد گیا دورِ جوانی اب ذرا تشکیک ہے |
| مرحلہ مشکل نہیں بس حوصلہ درکار ہے |
| ہاں اگر کچھ ہے تو بس اک تھوڑی سی تکنیک ہے |
| ایک ہی کافی ہے جب تو کس لئے ذوقِ نظر |
| عمر کی دشواریوں میں ہدیۂ تبریک ہے |
| راز کھُلتا ہے تو کھُل جائے کسے پرواہ امید |
| لوگوں کی ہر بات میں تنقید ہے تضحیک ہے |
معلومات