محبّت کا صلہ دینے میں کتنا وقت لگتا ہے |
ذرا سا مسکرا دینے میں کتنا وقت لگتا ہے |
فقیروں سے دعا لینا بھی مشکل تو نہیں ہوتا |
خدا کو پر صدا دینے میں کتنا وقت لگتا ہے |
گزر جاتی ہیں عمریں تب کہیں بنتا ہے گھر کوئی |
کسی کا گھر جلا دینے میں کتنا وقت لگتا ہے |
جنوں میں چھوڑ دیتے ہیں مسافر راستہ اپنا |
تو ان کو راستہ دینے میں کتنا وقت لگتا ہے |
جو رشتے ٹوٹ جائیں ہوں جو حائل بت اناؤں کے |
تعلّق پھر بنا دینے میں کتنا وقت لگتا ہے |
نہیں مشکل یہ کہہ دینا ہوا ایسا ہوا ویسا |
غلط فہمی مٹا دینے میں کتنا وقت لگتا ہے |
خطا کر کے جو شرمندہ ہو ں توبہ پر بھی ہوں مائل |
خطا کو پھر بُھلا دینے میں کتنا وقت لگتا ہے |
دلوں میں بغض و کینہ نفرتیں مٹنے نہ دے لیکن |
کدورت کو مٹا دینے میں کتنا وقت لگتا ہے |
لگے ڈھارس بندھانے میں خلوصِ دل سے ہمدردی |
کسی کو حوصلہ دینے میں کتنا وقت لگتا ہے |
کسی کو بھول جانے کے لئے درکار ہوں صدیاں |
مگر رنجش بُھلا دینے میں کتنا وقت لگتا ہے |
کسی کو گھر بنانے میں گزر جاتے ہیں سالوں بھی |
اسی گھر کو گرا دینے میں کتنا وقت لگتا ہے |
ہوئی ہو گی خطا مجھ سے مگر ہے پیار بھی تجھ سے |
بھلا طارق بتا دینے میں کتنا وقت لگتا ہے |
معلومات