عِشقِ خُدا کے وَاسطے عِشقِ نَبیﷺ دَرکار ہے

عِشقِ خُدا کے وَاسطے عِشقِ نَبی دَرکار ہے

عَا شق ہُوا جِس پر خُدا، وَجْہِ نَبی اَنوار ہے

عِشقِ نَبی جِس کو مِلا، قُربِ خُدا اُس کو مِلا

حُبِّ خُدا کا بَرمَلا، حُبِّ نَبی اِظہار ہے

ذکرِ خُدا کی محفِلیں خُلدِ بَرِیں کے باغ ہیں

خُلدِ بَریں تو با خُدا، تَختِ نَبی سَرکار ہے

مَالِک خُدا خُود آپ ہے بَانٹے نَبی کے ہاتھ سے

رَازِق سَبھی کا ہے خُدا، قَاسِم نَبی مُختَار ہے

آلِ عَبا ہیں پاک رُو قُدسی ہوں جیسے با وُضو

حَسن و حُسین و مُرتضٰی، آلِ نَبی اَطہار ہے

اُنظُر اِلٰی حَالِی یَا سَیّدی یَا صَاحِبَ الْاَفْضَالِی

عَرضِی سُنیں وہ ہر جَگہ، رُوحِ نَبی بیدار ہے

دَستِ کَرم دَرکار ہے، عَرضِی تِرے دَربار ہے

میں اَب نہیں ہوں غَم زَدہ، میرا نَبی غَم خَوار ہے