| اپنے جذبات کی شدّت کو چھپاؤں کیسے |
| چند لمحات کی فرقت کو بِتاؤں کیسے |
| سرد راتوں میں ترے پیار کی گرمی پہنچی |
| میں ترے قرب کی حدّت کو بھلاؤں کیسے |
| ہر کڑے وقت میں تُو نے ہی تو دلداری کی |
| میں ترا چھوڑ کے در جاؤں تو جاؤں کیسے |
| معرفت قرب میں تیرے جو عطا ہوتی ہے |
| ان خیالات کی جدّت کو بتاؤں کیسے |
| لطف آتا ہے ترے بارے میں جو سوچتا ہوں |
| سوچتا ہوں کہ محبّت کو بڑھاؤں کیسے |
| اوّل اوّل تری عظمت سے ڈرا کرتا تھا |
| آخر آخر ہے جنوں تجھ کو میں پاؤں کیسے |
| دیکھ کے چہرہ ترا کب کوئی عاشق نہ ہوا |
| حسن کے جلوے پہ قربان نہ جاؤں کیسے |
| طارق آغوش میں اس کے جو پنہ پائی ہے |
| اب کسی اور کو میں دوست بناؤں کیسے |
معلومات