| ہے قیامت کی گھڑی حق کے ولی روتے ہیں |
| عرش پر سارے ملک سارے نبی روتے ہیں |
| خلد میں حوروں کے رونے سے ہے ہنگام بپا |
| نوحہ کرتے ہوئے غلمان سبھی روتے ہیں |
| مضطرب غم سے ہیں اس درجہ علی شیر خدا |
| دیکھتے ہیں کبھی بچوں کو کبھی روتے ہیں |
| جسکو رونے نہ دیا باپ کے غم میں اس پر |
| چودہ صدیوں سے محبانِ علی روتے ہیں |
| جو نہیں روتے کبھی شاہِ ہدا کے غم میں |
| اپنی قسمت پہ سدا لوگ وہی روتے ہیں |
| تاب مجھ میں ہے نہ اور میرے قلم میں طاقت |
| لفظ قرطاس پہ جتنے ہیں سبھی روتے ہیں |
| حرف الفاظ سے مل مل کے گلے روتے ہیں |
| نقطے بے چین ہیں اعراب سبھی روتے ہیں |
| لرزہ قرطاس پہ طاری ہے رقم کیا ہو ظہیر |
| سرِ قرطاس جو ہے حرف سبھی روتے ہیں |
معلومات