| کس قدر باکمال ہو جائیں |
| ہم اگر خوش خصال ہو جائیں |
| روزِ محشر نہال ہو جائیں |
| گر محمدؐ کی آل ہو جائیں |
| بس یہی اک کمال کافی ہے |
| اس کے سب ہم خیال ہو جائیں |
| بن کے ہم تارے راہ دکھلائیں |
| آسماں کے اجال ہو جائیں |
| جشن ہو، جب وہ ہم سے راضی ہو |
| شہرِ دل میں دھمال ہو جائیں |
| اُس کی خوشبو میں ہے شفا ایسی |
| اکھڑی سانسیں بحال ہو جائیں |
| ہم پہ شیطاں نہ پا سکے قابو |
| ہم جو مثلِ بلال ہو جائیں |
| گرد شک کی ہو دور گر دل سے |
| بت سبھی پائمال ہو جائیں |
| نافع النّاس جو بنیں ثاقبؔ |
| لاجرم، لازوال ہو جائیں |
معلومات