| دل کہیں پارہ پارہ کر لیں گے |
| وحشتوں سے کنارہ کر لیں گے |
| رات کالی ہے راستہ مشکل |
| کوئی رہبر، ستارہ کر لیں گے |
| گر ارادہ ہو ساتھ دینے کا |
| ہم دُعا ، استخارہ کر لیں گے |
| تم سے عہدِ وفا کیا پہلے |
| تم کہو تو دوبارہ کر لیں گے |
| تم ہماری نہ اتنی فکر کرو |
| کام ہم اپنا سارا کر لیں گے |
| تم چلے آؤ مل کے ہم دونوں |
| جیسے تیسے گزارہ کر لیں گے |
| عادتیں اپنی کچھ بدل ڈالو |
| لوگ کب تک گوارا کر لیں گے |
| جب ضرورت پڑی تو وہ خود ہی |
| جانتے ہیں ، اشارہ کر لیں گے |
| طارق آئے گا امتحاں جب بھی |
| کچھ نہ کچھ ہم بھی چارہ کر لیں گے |
معلومات