| حکمِ کُن خالق سے جو ہستی کو فرماں مِل گیا |
| فخر موجودات سے تب اس کو ساماں مِل گیا |
| حیراں سی وہ زندگی بے تاب تھی جو ہجر میں |
| دِل جلوں کے کارواں تھے خوب استھاں مِل گیا |
| رونقیں ہستی میں ہیں کونین کو ہے جاں مِلی |
| داریں کی اِس بزم کو ہے نورِ یزداں مِل گیا |
| اِس نمودِ خاک کی بہبود کے بھی واسطے |
| اِک حکیمِ جان و دل اکسیر درماں مِل گیا |
| ظُلمتِ خناس میں مخلوق تھی بھٹکی ہوئی |
| ذاتِ باری پر دلوں کو بھی ہے ایقاں مِل گیا |
| شکر ہم نے پا لیا ہے نِعمتِ رَبّ کو تمام |
| کل خدا کی خلق کو مختارِ شاہاں مِل گیا |
| رہبری کے واسطے تھا چاہیے دانائے راز |
| انبیا سے لا مکاں میں عہد و پیماں مِل گیا |
| تیرگی کے پنجہ میں تھا یہ جہاں جکڑا ہوا |
| اہلِ دل کو خیر سے دامانِ تاباں مِل گیا |
| نور سے روشن ہوئے اذہان کے چشم و چراغ |
| جلوہ گاہِ کون کو ہے شمسِ تاباں مِل گیا |
| دیکھ کر حق کی شہادت دھر میں کوئی دے سکے |
| اس سند کے واسطے یزداں کو مہماں مِل گیا |
| جو جبیں میں ہے تڑپ بابِ سخا کی ہر گھڑی |
| عصمتِ محمود کو ہے اس سے ساماں مل گیا |
معلومات