| غزل |
| حسیں رُخسار پہ رُخسار ٹیکوں اور سُو جاؤں |
| تِرے مخمل بدن سے تن لپیٹوں اور سُو جاؤں |
| دہکتی آگ سے شعلے لپکتا ہے بَدن تیرا |
| چَلو آوٴ ذرا کچھ ہونٹ داغوں اور سُو جاؤں |
| تِری قربت سبھی آزار جیون کے بھلا ڈالے |
| مہکتی سانس سے خُوشبو چُراؤں اور سُو جاؤں |
| تھکاوٹ چاہے جتنی ہو تو راحت سے بدل ڈالے |
| حلاوت سرخ ہونٹوں سے کشیدوں اور سُو جاؤں |
| سراپا لطف ہیں جاناں تمھارے دست و پا مجھکو |
| ذرا پیروں سے تیرے پیر جوڑوں اور سُو جاؤں |
| رفاقت ہو کہ فرقت ہو تمھارے لطف کیا کہنے |
| جدائی میں تِرے سپنے سجاؤں اور سُو جاؤں |
| تِری چاہت مری رَاحت کا ساماں ہو گئی جاناں |
| ذرا اِک پل ترے پہلو میں لیٹوں اور سُو جاؤں |
| کبھی غمگین لمحے جب مرے جیون میں دَر آئیں |
| تِرے آنچل سے گرتے اشک پونچھوں اور سُو جاؤں |
| مِرے گیتوں کی ساری نغمگی تیرے سُروں سے ہے |
| اِدھر بیٹھو سُریلے تار چھیڑوں اور سُو جاؤں |
| مجسم اِک غزل ٹہلے مِرے آنگن شہاب احمد |
| پڑھوں جب جب اُسے اَشعار بولوں اور سُو جاؤں |
| شہاب احمد |
| ۲۶ ستمبر ۲۰۱۲ |
معلومات