| مرد ہونا چاہئے دم دار ہونا چاہئے |
| آدمی کو صاحبِ کردار ہونا چاہئے |
| مصلحت کیسی نہ ہو گر قوتِ شمشیر تو |
| اس زباں میں طاقتِ گفتار ہونا چاہئے |
| ساٹھ ستر سال سے بس سو رہے ہیں ہم وطن |
| اب تو میری قوم کو بیدار ہونا چاہئے |
| کامیابی نرم بستر پر کہاں مل پائے گی |
| زندگی کا راستہ دشوار ہونا چاہئے |
| لوٹنے والے ہمیشہ رہنما بنتے رہے |
| میرے مولا اب کوئی معمار ہونا چاہیے |
| ناؤ ہے طوفان ہے اور ناخدا کوئی نہیں |
| کم سے کم اک ہاتھ میں پتوار ہونا چاہئے |
| عرش پر پہنچے ہوئے ہیں ان امیروں کے دماغ |
| میں تو کہتا ہوں انہیں نادار ہونا چاہئے |
| بے قیادت کب تلک چلتے رہیں مومن ترے |
| جامی کوئی قافلہ سالار ہونا چاہئے |
معلومات