راہ تکتی ہے دل کی تنہائی |
کب سے ٹوٹی پڑی ہے شہنائی |
وہ مری روح سے لپٹتی ہے |
کیسی پوشاک تونے پہنائی |
ان کا جلوہ کہیں ہوا ہوگا |
آنکھ میں برق سی ہے لہرائی |
دم بخود ہیں کمال قدرت سے |
دیکھ کر ان کی بزم آرائی |
زلف ان کی کہیں کھلی ہوگی |
رقص کرنے لگی ہے پروائی |
آگہی کا مزا نرالا ہے |
دو کٹورے وہ آج بھر لائی |
فرق اتنا ہے تیری دنیا میں |
دل کی قیمت نہیں ہے سرسائی |
کیسے سہتا ستم قیامت کے |
آئینے پر پڑی تھی انگڑائی |
ہے جو دل میں بسا ہوا ہر دم |
کیسے کہہ دوں اسے میں ہرجائی |
دیکھ کر مجھ کو منتظر تیرا |
چشم نرگس بھی آج شرمائی |
دیکھ کر یوں اداس تم کو اویس |
رت بہاروں بھری بھی کملائی |
معلومات