| تُو جو چاہے تو بنا دے پیار کے قابل مجھے |
| چاہتا ہوں یہ کہ ہو تقویٰ عطا کامل مجھے |
| ہے بِلا شک زندگی بے بندگی شرمندگی |
| ہوں تِرا بندہ کیا ہے عشق نے گھائل مجھے |
| حسن اس کا پوچھتے ہو اس سے اندازہ کرو |
| ایک نظّارہ ہی اس کا کر گیا بسمل مجھے |
| احترامِ آدمیت ہے شرَف انسان کا |
| ورنہ حیواں بھی لگے ہیں پیار کے حامل مجھے |
| رہنمائی کے لئے بھیجے گئے جتنے سفیر |
| سب نے بتلایا کہ کیا ہے زیست کا حاصل مجھے |
| گو مجھے دعویٰ نہیں صحرا نوردی کا مگر |
| اپنے دیوانوں میں رکھیو اے خُدا شامل مجھے |
| جانتا ہوں ہے ادب پہلا قرینہ پیار کا |
| قُرب کے پہلے سبق نے ہی کیا فاضِل مجھے |
| لے کے جاؤں کس عدالت میں جہاں انصاف ہو |
| زخم خود دے اپنے ہاتھوں سے کہے قاتِل مجھے |
| راستہ جب پوچھنا ہو میں نظر آؤں انہیں |
| سب سمجھتے ہیں یہی معلوم ہے منزل مجھے |
| عاجزی سے پیش آنے کا یہ مطلب تو نہیں |
| میرا دشمن بھی سمجھ بیٹھے کبھی بُزدل مجھے |
| اس لئے رہتا ہے ہر دم اپنی سرحد کا خیال |
| حملہ آور ہو نہ شیطاں پا کے یوں غافل مجھے |
| طارق اتنا کیوں رہا ہے تم کو دنیا کا خیال |
| زندگی بھر تم نے ڈالی کس قدر مشکل مجھے |
معلومات