| سنگ کی زد پہ سہی آئنہ خانے میرے |
| ہرگز آسان نہیں عکس مٹانے میرے |
| مجھ سے ملتے ہی نہیں یار پرانے میرے |
| کیا انہیں بھول گئے سارے ٹھکانے میرے |
| وصل کی شب جو کھلیں بند قَبا کی گرہیں |
| ہوش سب چھین لئے ہوش ربا نے میرے |
| جسم کی خاک میں مدفن تھا خزینہ دل کا |
| کوئی آیا ہی نہیں دل کو چرانے میرے |
| چھوڑ بیٹھے ہو تو اب چھوڑ دو پیچھا میرا |
| یاد کیوں آتے ہو اب دل کو دکھانے میرے |
| ہاں کبھی پھول یا خوشبو بھرے خط ہوتے تھے |
| اب تو رہتی ہیں کتابیں ہی سرہانے میرے |
| جانے کس سحر سے سویا ہے مقدر یا رب |
| بھیج قسمت کی پری بخت جگانے میرے |
| اس نے چھوڑا نہ کبھی طرز تغافل کو سحابؔ |
| جس سے منسوب ہوئے سارے فسانے میرے |
معلومات