.jpg)
| دیکھ باتیں نہ بنا، چھوڑ دے بس |
| بھول جا عہدِ وفا، چھوڑ دے بس ! |
| کِس نے مانگی ہے صفائی تجھ سے؟ |
| کِس نے کی کس سے جفا؟ چھوڑ دے بس! |
| کون سا عشق؟ کہاں کی یادیں؟ |
| پھُونک دے، آگ لگا، چھوڑ دے بس! |
| اتنی پیچیدگیاں اچھی نہیں |
| جو لگے دل کو برا، چھوڑ دے بس |
| ہاں اِسی رنج میں راحت ہے مجھے |
| درد ہے میری دوا، چھوڑ دے بس! |
| کُود جانے دے مجھے کھائی میں |
| چھوڑ دے ہاتھ مرا، چھوڑ دے بس! |
| آنکھ میں خون اتر آیا ہے |
| نازشِ رنگِ حنا چھوڑ دے، بس! |
| امتحانات کی حد ہوتی ہے |
| دیکھ یہ دستِ دعا، چھوڑ دے بس! |
| کتنی منحُوس ہے دیوارِ شرم |
| آج اِس کو بھی گِرا، چھوڑ دے بس! |
| کس نے دیکھی ہے قیامت کی گھڑی؟ |
| کیا جزا، کیا ہے سزا، چھوڑ دے بس! |
| مذہب و مسلک و رنگت میں نہ پڑ |
| ایک ہے سب کا خدا، چھوڑ دے بس! |
| کیوں لیے پھرتا ہے مردہ ماضی؟ |
| لاش دریا میں بہا، چھوڑ دے بس! |
| میں نہیں کہتا کرے ترک شراب |
| ایک طاقت کا نشہ چھوڑ دے بس |
معلومات