| بلاؤں میں بنا تھا جو سہارا یاد تو ہو گا |
| گِھرے ہو دشمنوں میں ایک پیارا یاد تو ہو گا |
| بھٹک جائیں جو صحرا میں تو خضرِ راہ سا کوئی |
| سجھاتا ہے جو رستہ وہ ستارا یاد تو ہو گا |
| کسی کا حسن بن کر نقش بٹ جاتا ہے اجزا میں |
| مگر چہرہ اک ایسا بھی ہے سارا یاد تو ہو گا |
| جہاں کشتی کو ہو گا سامنا دریا میں طوفاں کا |
| تمہارے پاس جو آئے کنارا یاد تو ہوگا |
| بھری ہے ہر طرف دنیا مگر ہیں اجنبی سارے |
| وہ جس نے نام لے کر تھا پکارا یاد تو ہو گا |
| تمہارا اتنا کہہ دینا بھی کافی ہے جُدائی میں |
| تمہارے عشق کا کوئی ہے مارا یاد تو ہو گا |
| ہمیں تم چھوڑ کر جاؤ گے رستے میں نہیں ممکن |
| کسی کو یہ نہیں ہو گا گوارا یاد تو ہو گا |
| چلے جائیں گے اک دن چھوڑ کر دنیا تمہاری ہم |
| کرو گے ذکر کچھ تم بھی ہمارا یاد تو ہو گا |
| ہمیں طارق وفا کے نام پر جینا ہے مرنا ہے |
| کِیا کس نے محبّت کا اشارہ یاد تو ہو گا |
معلومات