اے نازنیں،اے دل رُبا،اے مہرباں کچھ تو بتا |
رشکِ زمیں ہے کیوں فلک کیا ہے وہاں کچھ تو بتا |
محفوظ تھے جو آج تک تیرے دلِ غمگین میں |
وہ رازِ غم مجھ پر ہوئے ہیں کیوں عیاں کچھ تو بتا |
آئینہ رُخ ، زہرہ جبیں ، حسنِ جہاں تھا تو کبھی |
چھائی ہیں اب جو جُھرّیاں کیا ہے زماں کچھ تو بتا |
مرشد مرے ، یاور مرے ، کیا دیکھتا ہے مجھ میں تو |
عشق و جنوں ، فہم و ذکا ، سود و زیاں ، کچھ تو بتا |
کیوں مبتلا ہے فاختہ آہ و فغاں میں ،کیا ہوا |
کیا لٹ گیا ہے پھر سے اُس کا آشیاں کچھ تو بتا |
سوز و گُداز اب پہلے جیسا وعظ میں تیرے نہیں |
بجھتی نہیں ہے تشنگی جاؤں کہاں کچھ تو بتا |
میں زندگی کے پیچ و خم سے آشنا ہوں ہی نہیں |
لکّھوں بھلا کیسے میں تیری داستاں کچھ تو بتا |
معلومات