| ہوں غزل گو مگر اسلوب جدا رکھتا ہوں |
| میں سخن کے سبھی مطلوب جدا رکھتا ہوں |
| خط حفاظت سے مجھے رکھنے کی عادت تو نہیں |
| اس کے آ جائیں جو مکتوب جدا رکھتا ہوں |
| رند ہوں وہ جو پلائے تو پیا کرتا ہوں |
| اس کا پیمانۂ مشروب جدا رکھتا ہوں |
| دے کے دل ہجر میں آہیں تو بھرا کرتا ہوں |
| یہ الگ بات ہے محبوب جدا رکھتا ہوں |
| آئنہ بن کے دکھاتا ہے وہ اپنا چہرہ |
| شعر جو اس سے ہوں منسوب جدا رکھتا ہوں |
| ہے محبّت کا تعلّق تو سبھی لوگوں سے |
| دوست جو مجھ کو ہیں مرغوب جدا رکھتا ہوں |
| یوں چکا چوند سے دنیا کی میں غافل تو نہیں |
| اس سے ہوتا نہیں مغلوب جدا رکھتا ہوں |
| طارق آزادیٔ اظہار کا قائل ہوں مگر |
| سوچ کرتی ہے جو مصلوب جدا رکھتا ہوں |
معلومات